၄. ဉာဏတ္ထဝိကတ္ထေရအပဒါနံ

၃၅. ‘‘ကဏိကာရံဝ ဇလိတံ၊ ဒီပရုက္ခံဝ ဇောတိတံ၊

ကဉ္စနံဝ ဝိရောစန္တံ၊ အဒ္ဒသံ ဒွိပဒုတ္တမံ.

၃၆. ‘‘ကမဏ္ဍလုံ ဌပေတွာန၊ ဝါကစီရဉ္စ ကုဏ္ဍိကံ၊

ဧကံသံ အဇိနံ ကတွာ၊ ဗုဒ္ဓသေဋ္ဌံ ထဝိံ အဟံ.

၃၇. ‘‘‘တမန္ဓကာရံ ဝိဓမံ၊ မောဟဇာလသမာကုလံ၊

ဉာဏာလောကံ ဒဿေတွာန၊ နိတ္တိဏ္ဏောသိ မဟာမုနိ.

၃၈. ‘‘‘သမုဒ္ဓရသိမံ လောကံ၊ သဗ္ဗာဝန္တမနုတ္တရံ၊

ဉာဏေ တေ ဥပမာ နတ္ထိ၊ ယာဝတာဇဂတောဂတိ [ယာဝတာ စ ဂတောဂတိ (ပီ. က.)].

၃၉. ‘‘‘တေန ဉာဏေန သဗ္ဗညူ၊ ဣတိ ဗုဒ္ဓေါ ပဝုစ္စတိ၊

ဝန္ဒာမိ တံ မဟာဝီရံ၊ သဗ္ဗညုတမနာဝရံ’.

၄၀. ‘‘သတသဟဿိတော ကပ္ပေ၊ ဗုဒ္ဓသေဋ္ဌံ ထဝိံ အဟံ၊

ဒုဂ္ဂတိံ နာဘိဇာနာမိ၊ ဉာဏတ္ထဝါယိဒံ ဖလံ၊

၄၁. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ၊

၄၂. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၄၃. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဉာဏတ္ထဝိကော ထေရော ဣမာ ဂါထာယော

အဘာသိတ္ထာတိ.

ဉာဏတ္ထဝိကတ္ထေရဿာပဒါနံ စတုတ္ထံ.