၅. ဥစ္ဆုခဏ္ဍိကတ္ထေရအပဒါနံ

၄၄. ‘‘နဂရေ ဗန္ဓုမတိယာ၊ ဒွါရပါလော အဟောသဟံ၊

အဒ္ဒသံ ဝိရဇံ ဗုဒ္ဓံ၊ သဗ္ဗဓမ္မာန ပါရဂုံ.

၄၅. ‘‘ဥစ္ဆုခဏ္ဍိကမာဒါယ၊ ဗုဒ္ဓသေဋ္ဌဿဒါသဟံ၊

ပသန္နစိတ္တော သုမနော၊ ဝိပဿိဿ မဟေသိနော.

၄၆. ‘‘ဧကနဝုတိတော ကပ္ပေ၊ ယံ ဥစ္ဆုမဒဒိံ တဒါ၊

ဒုဂ္ဂတိံ နာဘိဇာနာမိ၊ ဥစ္ဆုခဏ္ဍဿိဒံ ဖလံ.

၄၇. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၄၈. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၄၉. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဥစ္ဆုခဏ္ဍိကော ထေရော ဣမာ ဂါထာယော

အဘာသိတ္ထာတိ.

ဥစ္ဆုခဏ္ဍိကတ္ထေရဿာပဒါနံ ပဉ္စမံ.