၇. ဥစ္ဆင်္ဂပုပ္ဖိယတ္ထေရအပဒါနံ

၁၄၂. ‘‘နဂရေ ဗန္ဓုမတိယာ၊ အဟောသိံ မာလိကော တဒါ၊

ဥစ္ဆင်္ဂံ ပူရယိတွာန၊ အဂမံ အန္တရာပဏံ.

၁၄၃. ‘‘ဘဂဝါ တမှိ သမယေ၊ ဘိက္ခုသံဃပုရက္ခတော၊

မဟတာ အာနုဘာဝေန၊ နိယျာတိ လောကနာယကော.

၁၄၄. ‘‘ဒိသွာန လောကပဇ္ဇောတံ၊ ဝိပဿိံ လောကတာရဏံ၊

ပုပ္ဖံ ပဂ္ဂယှ ဥစ္ဆင်္ဂါ၊ ဗုဒ္ဓသေဋ္ဌံ အပူဇယိံ.

၁၄၅. ‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၁၄၆. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၁၄၇. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၁၄၈. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဥစ္ဆင်္ဂပုပ္ဖိယော ထေရော ဣမာ ဂါထာယော အဘာသိတ္ထာတိ.

ဥစ္ဆင်္ဂပုပ္ဖိယတ္ထေရဿာပဒါနံ သတ္တမံ.