၈. ယာဂုဒါယကတ္ထေရအပဒါနံ

၁၄၉. ‘‘အတိထိံ [အတီတံ (က.)] မေ ဂဟေတွာန၊ အဂစ္ဆိံ ဂါမကံ တဒါ၊

သမ္ပုဏ္ဏနဒိကံ ဒိသွာ၊ သံဃာရာမံ ဥပါဂမိံ.

၁၅၀. ‘‘အာရညကာ ဓုတဓရာ၊ ဈာယိနော လူခစီဝရာ၊

ဝိဝေကာဘိရတာ ဓီရာ၊ သံဃာရာမေ ဝသန္တိ တေ.

၁၅၁. ‘‘ဂတိ တေသံ ဥပစ္ဆိန္နာ၊ သုဝိမုတ္တာန တာဒိနံ၊

ပိဏ္ဍာယ တေ န ဂစ္ဆန္တိ၊ ဩရုဒ္ဓနဒိတာယ ဟိ [ဩရုဒ္ဓနဒိကာယတိံ (သျာ.)].

၁၅၂. ‘‘ပသန္နစိတ္တော သုမနော၊ ဝေဒဇာတော ကတဉ္ဇလီ၊

တဏ္ဍုလံ မေ ဂဟေတွာန၊ ယာဂုဒါနံ အဒါသဟံ.

၁၅၃. ‘‘ပဉ္စန္နံ ယာဂုံ ဒတွာန၊ ပသန္နော သေဟိ ပါဏိဘိ၊

သကကမ္မာဘိရဒ္ဓေါဟံ၊ တာဝတိံသမဂစ္ဆဟံ.

၁၅၄. ‘‘မဏိမယဉ္စ မေ ဗျမှံ၊ နိဗ္ဗတ္တိ တိဒသေ ဂဏေ၊

နာရီဂဏေဟိ သဟိတော၊ မောဒါမိ ဗျမှမုတ္တမေ.

၁၅၅. ‘‘တေတ္တိံသက္ခတ္တုံ ဒေဝိန္ဒော၊ ဒေဝရဇ္ဇမကာရယိံ၊

တိံသက္ခတ္တုံ စက္ကဝတ္တီ၊ မဟာရဇ္ဇမကာရယိံ.

၁၅၆. ‘‘ပဒေသရဇ္ဇံ ဝိပုလံ၊ ဂဏနာတော အသင်္ခိယံ၊

ဒေဝလောကေ မနုဿေ ဝါ၊ အနုဘောတွာ သယံ [ယသံ (သျာ.)] အဟံ.

၁၅၇. ‘‘ပစ္ဆိမေ ဘဝေ သမ္ပတ္တေ၊ ပဗ္ဗဇိံ အနဂါရိယံ၊

သဟ ဩရောပိတေ ကေသေ၊ သဗ္ဗံ သမ္ပဋိဝိဇ္ဈဟံ.

၁၅၈. ‘‘ခယတော ဝယတော စာပိ၊ သမ္မသန္တော ကဠေဝရံ၊

ပုရေ သိက္ခာပဒါဒါနာ၊ အရဟတ္တမပါပုဏိံ.

၁၅၉. ‘‘သုဒိန္နံ မေ ဒါနဝရံ၊ ဝါဏိဇ္ဇံ သမ္ပယောဇိတံ၊

တေနေဝ ယာဂုဒါနေန၊ ပတ္တောမှိ အစလံ ပဒံ.

၁၆၀. ‘‘သောကံ ပရိဒ္ဒဝံ ဗျာဓိံ၊ ဒရထံ စိတ္တတာပနံ၊

နာဘိဇာနာမိ ဥပ္ပန္နံ၊ ယာဂုဒါနဿိဒံ ဖလံ.

၁၆၁. ‘‘ယာဂုံ သံဃဿ ဒတွာန၊ ပုညက္ခေတ္တေ အနုတ္တရေ၊

ပဉ္စာနိသံသေ အနုဘောမိ၊ အဟော ယာဂုသုယိဋ္ဌတာ.

၁၆၂. ‘‘အဗျာဓိတာ ရူပဝတာ၊ ခိပ္ပံ ဓမ္မနိသန္တိတာ [နိဗုဇ္ဈိတာ (သျာ.)]၊

လာဘိတာ အန္နပါနဿ၊ အာယု ပဉ္စမကံ မမ.

၁၆၃. ‘‘ယော ကောစိ ဝေဒံ ဇနယံ၊ သံဃေ ယာဂုံ ဒဒေယျ သော၊

ဣမာနိ ပဉ္စ ဌာနာနိ၊ ပဋိဂဏှေယျ ပဏ္ဍိတော.

၁၆၄. ‘‘ကရဏီယံ ကတံ သဗ္ဗံ၊ ဘဝါ ဥဂ္ဃါဋိတာ မယာ၊

သဗ္ဗာသဝါ ပရိက္ခီဏာ၊ နတ္ထိ ဒါနိ ပုနဗ္ဘဝေါ.

၁၆၅. ‘‘သော အဟံ ဝိစရိဿာမိ၊ ဂါမာ ဂါမံ ပုရာ ပုရံ၊

နမဿမာနော သမ္ဗုဒ္ဓံ၊ ဓမ္မဿ စ သုဓမ္မတံ.

၁၆၆. ‘‘တိံသကပ္ပသဟဿမှိ၊ ယံ ဒါနမဒဒိံ တဒါ၊

ဒုဂ္ဂတိံ နာဘိဇာနာမိ၊ ယာဂုဒါနဿိဒံ ဖလံ.

၁၆၇. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၁၆၈. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၁၆၉. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ယာဂုဒါယကော ထေရော ဣမာ ဂါထာယော အဘာသိတ္ထာတိ.

ယာဂုဒါယကတ္ထေရဿာပဒါနံ အဋ္ဌမံ.