၉. ဓမ္မစက္ကိကတ္ထေရအပဒါနံ

၁၀၂. ‘‘သိဒ္ဓတ္ထဿ ဘဂဝတော၊ သီဟာသနဿ သမ္မုခါ၊

ဓမ္မစက္ကံ မေ ဌပိတံ၊ သုကတံ ဝိညုဝဏ္ဏိတံ.

၁၀၃. ‘‘စာရုဝဏ္ဏောဝ သောဘာမိ၊ သယောဂ္ဂဗလဝါဟနော၊

ပရိဝါရေန္တိ မံ နိစ္စံ၊ အနုယန္တာ ဗဟုဇ္ဇနာ.

၁၀၄. ‘‘သဋ္ဌိတူရိယသဟဿေဟိ၊ ပရိစာရေမဟံ သဒါ၊

ပရိဝါရေန သောဘာမိ၊ ပုညကမ္မဿိဒံ ဖလံ.

၁၀၅. ‘‘စတုန္နဝုတိတော ကပ္ပေ၊ ယံ စက္ကံ ဌပယိံ အဟံ၊

ဒုဂ္ဂတိံ နာဘိဇာနာမိ၊ ဓမ္မစက္ကဿိဒံ ဖလံ.

၁၀၆. ‘‘ဣတော ဧကာဒသေ ကပ္ပေ၊ အဋ္ဌာသိံသု ဇနာဓိပါ၊

သဟဿရာဇနာမေန၊ စက္ကဝတ္တီ မဟဗ္ဗလာ.

၁၀၇. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဓမ္မစက္ကိကော ထေရော ဣမာ ဂါထာယော အဘာသိတ္ထာတိ.

ဓမ္မစက္ကိကတ္ထေရဿာပဒါနံ နဝမံ.