၁၀. ကပ္ပရုက္ခိယတ္ထေရအပဒါနံ

၁၀၈. ‘‘သိဒ္ဓတ္ထဿ ဘဂဝတော၊ ထူပသေဋ္ဌဿ သမ္မုခါ၊

ဝိစိတ္တဒုဿေ လဂေတွာ [လဂ္ဂေတွာ (သီ. သျာ.)]၊ ကပ္ပရုက္ခံ ဌပေသဟံ.

၁၀၉. ‘‘ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ၊

သောဘယန္တော မမ ဒွါရံ၊ ကပ္ပရုက္ခော ပတိဋ္ဌတိ.

၁၁၀. ‘‘အဟဉ္စ ပရိသာ စေဝ၊ ယေ ကေစိ မမ ဝဿိတာ [နိဿိတာ (သီ.)]၊

တမှာ ဒုဿံ ဂဟေတွာန၊ နိဝါသေမ မယံ သဒါ [တဒါ (သျာ.)].

၁၁၁. ‘‘စတုန္နဝုတိတော ကပ္ပေ၊ ယံ ရုက္ခံ ဌပယိံ အဟံ၊

ဒုဂ္ဂတိံ နာဘိဇာနာမိ၊ ကပ္ပရုက္ခဿိဒံ ဖလံ.

၁၁၂. ‘‘ဣတော စ သတ္တမေ ကပ္ပေ၊ သုစေဠာ အဋ္ဌ ခတ္တိယာ၊

သတ္တရတနသမ္ပန္နာ၊ စက္ကဝတ္တီ မဟဗ္ဗလာ.

၁၁၃. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ကပ္ပရုက္ခိယော ထေရော ဣမာ ဂါထာယော အဘာသိတ္ထာတိ.

ကပ္ပရုက္ခိယတ္ထေရဿာပဒါနံ ဒသမံ.

ကုဏ္ဍဓာနဝဂ္ဂေါ စတုတ္ထော.