၈. အာယာဂဒါယကတ္ထေရအပဒါနံ

၉၄. ‘‘နိဗ္ဗုတေ လောကနာထမှိ၊ သိခိမှိ ဝဒတံ ဝရေ၊

ဟဋ္ဌော ဟဋ္ဌေန စိတ္တေန၊ အဝန္ဒိံ ထူပမုတ္တမံ.

၉၅. ‘‘ဝဍ္ဎကီဟိ ကထာပေတွာ၊ မူလံ ဒတွာနဟံ တဒါ၊

ဟဋ္ဌော ဟဋ္ဌေန စိတ္တေန၊ အာယာဂံ ကာရပေသဟံ.

၉၆. ‘‘အဋ္ဌ ကပ္ပါနိ ဒေဝေသု၊ အဗ္ဗောကိဏ္ဏံ [အဗ္ဗောစ္ဆိန္နံ (သီ.)] ဝသိံ အဟံ၊

အဝသေသေသု ကပ္ပေသု၊ ဝေါကိဏ္ဏံ သံသရိံ အဟံ.

၉၇. ‘‘ကာယေ ဝိသံ န ကမတိ၊ သတ္ထာနိ န စ ဟန္တိ မေ၊

ဥဒကေဟံ န မိယျာမိ၊ အာယာဂဿ ဣဒံ ဖလံ.

၉၈. ‘‘ယဒိစ္ဆာမိ အဟံ ဝဿံ၊ မဟာမေဃော ပဝဿတိ၊

ဒေဝါပိ မေ ဝသံ ဧန္တိ၊ ပုညကမ္မဿိဒံ ဖလံ.

၉၉. ‘‘သတ္တရတနသမ္ပန္နော၊ တိသက္ခတ္တုံ အဟောသဟံ၊

န မံ ကေစာဝဇာနန္တိ၊ ပုညကမ္မဿိဒံ ဖလံ.

၁၀၀. ‘‘ဧကတ္တိံသေ ဣတော ကပ္ပေ၊ အာယာဂံ ယမကာရယိံ၊

ဒုဂ္ဂတိံ နာဘိဇာနာမိ၊ အာယာဂဿ ဣဒံ ဖလံ.

၁၀၁. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အာယာဂဒါယကော ထေရော ဣမာ ဂါထာယော အဘာသိတ္ထာတိ.

အာယာဂဒါယကတ္ထေရဿာပဒါနံ အဋ္ဌမံ.