၇. လသုဏဒါယကတ္ထေရအပဒါနံ

၈၉. ‘‘ဟိမဝန္တဿာဝိဒူရေ၊ တာပသော အာသဟံ တဒါ၊

လသုဏံ ဥပဇီဝါမိ၊ လသုဏံ မယှဘောဇနံ.

၉၀. ‘‘ခါရိယော ပူရယိတွာန၊ သံဃာရာမမဂစ္ဆဟံ၊

ဟဋ္ဌော ဟဋ္ဌေန စိတ္တေန၊ သံဃဿ လသုဏံ အဒံ.

၉၁. ‘‘ဝိပဿိဿ နရဂ္ဂဿ၊ သာသနေ နိရတဿဟံ၊

သံဃဿ လသုဏံ ဒတွာ၊ ကပ္ပံ သဂ္ဂမှိ မောဒဟံ.

၉၂. ‘‘ဧကနဝုတိတော ကပ္ပေ၊ လသုဏံ ယမဒံ တဒါ၊

ဒုဂ္ဂတိံ နာဘိဇာနာမိ၊ လသုဏဿ ဣဒံ ဖလံ.

၉၃. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ လသုဏဒါယကော ထေရော ဣမာ ဂါထာယော အဘာသိတ္ထာတိ၊

လသုဏဒါယကတ္ထေရဿာပဒါနံ သတ္တမံ.