၆. အဓိမုတ္တတ္ထေရအပဒါနံ

၈၄. ‘‘နိဗ္ဗုတေ လောကနာထမှိ၊ အတ္ထဒဿီနရုတ္တမေ၊

ဥပဋ္ဌဟိံ ဘိက္ခုသံဃံ၊ ဝိပ္ပသန္နေန စေတသာ.

၈၅. ‘‘နိမန္တေတွာ ဘိက္ခုသံဃံ [သံဃရတနံ (သီ. သျာ.)]၊ ဥဇုဘူတံ သမာဟိတံ၊

ဥစ္ဆုနာ မဏ္ဍပံ ကတွာ၊ ဘောဇေသိံ သံဃမုတ္တမံ.

၈၆. ‘‘ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ၊

သဗ္ဗေ သတ္တေ အဘိဘောမိ [အတိဘောမိ (သီ. က.)]၊ ပုညကမ္မဿိဒံ ဖလံ.

၈၇. ‘‘အဋ္ဌာရသေ ကပ္ပသတေ၊ ယံ ဒါနမဒဒိံ တဒါ၊

ဒုဂ္ဂတိံ နာဘိဇာနာမိ၊ ဥစ္ဆုဒါနဿိဒံ ဖလံ.

၈၈. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အဓိမုတ္တော ထေရော ဣမာ ဂါထာယော အဘာသိတ္ထာတိ၊

အဓိမုတ္တတ္ထေရဿာပဒါနံ ဆဋ္ဌံ.