၃. မဟာကစ္စာနတ္ထေရအပဒါနံ

၃၁. ‘‘ပဒုမုတ္တရနာထဿ၊ ပဒုမံ နာမ စေတိယံ၊

သိလာသနံ [သီဟာသနံ (က.)] ကာရယိတွာ၊ သုဝဏ္ဏေနာဘိလေပယိံ.

၃၂. ‘‘ရတနာမယဆတ္တဉ္စ၊ ပဂ္ဂယှ ဝါဠဗီဇနိံ [ဝါဠဗီဇနီ (သီ. သျာ.)]၊

ဗုဒ္ဓဿ အဘိရောပေသိံ၊ လောကဗန္ဓုဿ တာဒိနော.

၃၃. ‘‘ယာဝတာ ဒေဝတာ ဘုမ္မာ [ဘူမာ (က.)]၊ သဗ္ဗေ သန္နိပတုံ တဒါ၊

ရတနာမယဆတ္တာနံ၊ ဝိပါကံ ကထယိဿတိ.

၃၄. ‘‘တဉ္စ သဗ္ဗံ သုဏိဿာမ၊ ကထယန္တဿ သတ္ထုနော၊

ဘိယျော ဟာသံ ဇနေယျာမ၊ သမ္မာသမ္ဗုဒ္ဓသာသနေ.

၃၅. ‘‘ဟေမာသနေ နိသီဒိတွာ၊ သယမ္ဘူ အဂ္ဂပုဂ္ဂလော၊

ဘိက္ခုသံဃပရိဗျူဠှော [ပရိဗ္ဗူဠှော (သီ.)]၊ ဣမာ ဂါထာ အဘာသထ.

၃၆. ‘‘‘ယေနိဒံ အာသနံ ဒိန္နံ၊ သောဝဏ္ဏံ ရတနာမယံ၊

တမဟံ ကိတ္တယိဿာမိ၊ သုဏာထ မမ ဘာသတော.

၃၇. ‘‘‘တိံသကပ္ပါနိ ဒေဝိန္ဒော၊ ဒေဝရဇ္ဇံ ကရိဿတိ၊

သမန္တာ ယောဇနသတံ၊ အာဘာယာဘိဘဝိဿတိ.

၃၈. ‘‘‘မနုဿလောကမာဂန္တွာ၊ စက္ကဝတ္တီ ဘဝိဿတိ၊

ပဘဿရောတိ နာမေန၊ ဥဂ္ဂတေဇော ဘဝိဿတိ.

၃၉. ‘‘‘ဒိဝါ ဝါ ယဒိ ဝါ ရတ္တိံ၊ သတရံသီဝ ဥဂ္ဂတော၊

သမန္တာ အဋ္ဌရတနံ၊ ဥဇ္ဇောတိဿတိ ခတ္တိယော.

၄၀. ‘‘‘ကပ္ပသတသဟဿမှိ၊ ဩက္ကာကကုလသမ္ဘဝေါ၊

ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ.

၄၁. ‘‘‘တုသိတာ ဟိ စဝိတွာန၊ သုက္ကမူလေန စောဒိတော၊

ကစ္စာနော နာမ နာမေန၊ ဗြဟ္မဗန္ဓု ဘဝိဿတိ.

၄၂. ‘‘‘သော ပစ္ဆာ ပဗ္ဗဇိတွာန၊ အရဟာ ဟေဿတိနာသဝေါ၊

ဂေါတမော လောကပဇ္ဇောတော၊ အဂ္ဂဋ္ဌာနေ ဌပေဿတိ.

၄၃. ‘‘‘သံခိတ္တပုစ္ဆိတံ [သံခိတ္တံ ပုစ္ဆိတံ (သျာ. က.)] ပဉှံ၊ ဝိတ္ထာရေန ကထေဿတိ၊

ကထယန္တော စ တံ ပဉှံ၊ အဇ္ဈာသယံ [အဇ္ဈာသံ (သီ.)၊ အဗ္ဘာသံ (က.)] ပူရယိဿတိ’.

၄၄. ‘‘အဍ္ဎေ ကုလေ အဘိဇာတော၊ ဗြာဟ္မဏော မန္တပါရဂူ၊

ဩဟာယ ဓနဓညာနိ၊ ပဗ္ဗဇိံ အနဂါရိယံ.

၄၅. ‘‘သံခိတ္တေနပိ ပုစ္ဆန္တေ၊ ဝိတ္ထာရေန ကထေမဟံ၊

အဇ္ဈာသယံ တေသံ ပူရေမိ၊ တောသေမိ ဒွိပဒုတ္တမံ.

၄၆. ‘‘တောသိတော မေ မဟာဝီရော၊ သယမ္ဘူ အဂ္ဂပုဂ္ဂလော၊

ဘိက္ခုသံဃေ နိသီဒိတွာ၊ ဧတဒဂ္ဂေ ဌပေသိ မံ.

၄၇. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ မဟာကစ္စာနော ထေရော ဣမာ ဂါထာယော အဘာသိတ္ထာတိ.

မဟာကစ္စာနတ္ထေရဿာပဒါနံ တတိယံ.