၄. ကာဠုဒါယိတ္ထေရအပဒါနံ

၄၈. ‘‘ပဒုမုတ္တရဗုဒ္ဓဿ၊ လောကဇေဋ္ဌဿ တာဒိနော၊

အဒ္ဓါနံ ပဋိပန္နဿ၊ စရတော စာရိကံ တဒါ.

၄၉. ‘‘သုဖုလ္လံ ပဒုမံ ဂယှ၊ ဥပ္ပလံ မလ္လိကဉ္စဟံ၊

ပရမန္နံ ဂဟေတွာန၊ အဒါသိံ သတ္ထုနော အဟံ.

၅၀. ‘‘ပရိဘုဉ္ဇိ မဟာဝီရော၊ ပရမန္နံ သုဘောဇနံ၊

တဉ္စ ပုပ္ဖံ ဂဟေတွာန၊ ဇနဿ သမ္ပဒဿယိ.

၅၁. ‘‘ဣဋ္ဌံ ကန္တံ [ကန္တယိဒံ (သျာ.)]၊ ပိယံ လောကေ၊ ဇလဇံ ပုပ္ဖမုတ္တမံ၊

သုဒုက္ကရံ ကတံ တေန၊ ယော မေ ပုပ္ဖံ အဒါသိဒံ.

၅၂. ‘‘ယော ပုပ္ဖမဘိရောပေသိ၊ ပရမန္နဉ္စဒါသိ မေ၊

တမဟံ ကိတ္တယိဿာမိ၊ သုဏာထ မမ ဘာသတော.

၅၃. ‘‘‘ဒသ အဋ္ဌ စက္ခတ္တုံ [ဒသ စဋ္ဌက္ခတ္တုံ (သီ.)၊ ဒသမဋ္ဌက္ခတ္တုံ (သျာ.)] သော၊ ဒေဝရဇ္ဇံ ကရိဿတိ၊

ဥပ္ပလံ ပဒုမဉ္စာပိ၊ မလ္လိကဉ္စ တဒုတ္တရိ.

၅၄. ‘‘‘အဿ ပုညဝိပါကေန၊ ဒိဗ္ဗဂန္ဓသမာယုတံ၊

အာကာသေ ဆဒနံ ကတွာ၊ ဓာရယိဿတိ တာဝဒေ.

၅၅. ‘‘‘ပဉ္စဝီသတိက္ခတ္တုဉ္စ၊ စက္ကဝတ္တီ ဘဝိဿတိ၊

ပထဗျာ ရဇ္ဇံ ပဉ္စသတံ၊ ဝသုဓံ အာဝသိဿတိ.

၅၆. ‘‘‘ကပ္ပသတသဟဿမှိ၊ ဩက္ကာကကုလသမ္ဘဝေါ၊

ဂေါတမော နာမ ဂေါတ္တေန [နာမေန (သီ. သျာ. က.)]၊ သတ္ထာ လောကေ ဘဝိဿတိ.

၅၇. ‘‘‘သကကမ္မာဘိရဒ္ဓေါ သော၊ သုက္ကမူလေန စောဒိတော၊

သကျာနံ နန္ဒိဇနနော၊ ဉာတိဗန္ဓု ဘဝိဿတိ.

၅၈. ‘‘‘သော ပစ္ဆာ ပဗ္ဗဇိတွာန၊ သုက္ကမူလေန စောဒိတော၊

သဗ္ဗာသဝေ ပရိညာယ၊ နိဗ္ဗာယိဿတိနာသဝေါ.

၅၉. ‘‘‘ပဋိသမ္ဘိဒမနုပ္ပတ္တံ၊ ကတကိစ္စမနာသဝံ၊

ဂေါတမော လောကဗန္ဓု တံ [သော (သီ.)]၊ ဧတဒဂ္ဂေ ဌပေဿတိ.

၆၀. ‘‘‘ပဓာနပဟိတတ္တော သော၊ ဥပသန္တော နိရူပဓိ၊

ဥဒါယီ နာမ နာမေန၊ ဟေဿတိ သတ္ထု သာဝကော’.

၆၁. ‘‘ရာဂေါ ဒေါသော စ မောဟော စ၊ မာနော မက္ခော စ ဓံသိတော၊

သဗ္ဗာသဝေ ပရိညာယ၊ ဝိဟရာမိ အနာသဝေါ.

၆၂. ‘‘တောသယိဉ္စာပိ သမ္ဗုဒ္ဓံ၊ အာတာပီ နိပကော အဟံ၊

ပသာဒိတော [ပမောဒိတော (သီ.)] စ သမ္ဗုဒ္ဓေါ၊ ဧတဒဂ္ဂေ ဌပေသိ မံ.

၆၃. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ကာဠုဒါယီ ထေရော ဣမာ ဂါထာယော အဘာသိတ္ထာတိ၊

ကာဠုဒါယီထေရဿာပဒါနံ စတုတ္ထံ.