၂. သာဂတတ္ထေရအပဒါနံ

၁၇. ‘‘သောဘိတော နာမ နာမေန၊ အဟောသိံ ဗြာဟ္မဏော တဒါ၊

ပုရက္ခတော သသိဿေဟိ၊ အာရာမံ အဂမာသဟံ.

၁၈. ‘‘ဘဂဝါ တမှိ သမယေ၊ ဘိက္ခုသံဃပုရက္ခတော၊

အာရာမဒွါရာ နိက္ခမ္မ၊ အဋ္ဌာသိ ပုရိသုတ္တမော.

၁၉. ‘‘တမဒ္ဒသာသိံ သမ္ဗုဒ္ဓံ၊ ဒန္တံ ဒန္တပုရက္ခတံ၊

သကံ စိတ္တံ ပသာဒေတွာ၊ သန္ထဝိံ လောကနာယကံ.

၂၀. ‘‘ယေ ကေစိ ပါဒပါ သဗ္ဗေ၊ မဟိယာ တေ ဝိရူဟရေ၊

ဗုဒ္ဓိမန္တော တထာ သတ္တာ၊ ရုဟန္တိ ဇိနသာသနေ.

၂၁. ‘‘သတ္ထဝါဟောသိ သပ္ပညော၊ မဟေသိ ဗဟုကေ ဇနေ၊

ဝိပထာ ဥဒ္ဓရိတွာန၊ ပထံ အာစိက္ခသေ တုဝံ.

၂၂. ‘‘ဒန္တော ဒန္တပရိကိဏ္ဏော [ပုရက္ခတော (သျာ.)]၊ ဈာယီ ဈာနရတေဟိ စ၊

အာတာပီ ပဟိတတ္တေဟိ၊ ဥပသန္တေဟိ တာဒိဘိ.

၂၃. ‘‘အလင်္ကတော ပရိသာဟိ၊ ပုညဉာဏေဟိ သောဘတိ၊

ပဘာ နိဒ္ဓါဝတေ တုယှံ၊ သူရိယောဒယနေ ယထာ.

၂၄. ‘‘ပသန္နစိတ္တံ ဒိသွာန၊ မဟေသီ ပဒုမုတ္တရော၊

ဘိက္ခုသံဃေ ဌိတော သတ္ထာ၊ ဣမာ ဂါထာ အဘာသထ.

၂၅. ‘‘‘ယော သော ဟာသံ ဇနေတွာန၊ မမံ ကိတ္တေသိ ဗြာဟ္မဏော၊

ကပ္ပါနံ သတသဟဿံ၊ ဒေဝလောကေ ရမိဿတိ.

၂၆. ‘‘‘တုသိတာ ဟိ စဝိတွာန၊ သုက္ကမူလေန စောဒိတော၊

ဂေါတမဿ ဘဂဝတော၊ သာသနေ ပဗ္ဗဇိဿတိ.

၂၇. ‘‘‘တေန ကမ္မေန သုကတေန၊ အရဟတ္တံ [တုဋ္ဌဟဋ္ဌံ (သျာ. က.)] လဘိဿတိ၊

သာဂတော နာမ နာမေန၊ ဟေဿတိ သတ္ထု သာဝကော’.

၂၈. ‘‘ပဗ္ဗဇိတွာန ကာယေန၊ ပါပကမ္မံ ဝိဝဇ္ဇယိံ၊

ဝစီဒုစ္စရိတံ ဟိတွာ၊ အာဇီဝံ ပရိသောဓယိံ.

၂၉. ‘‘ဧဝံ ဝိဟရမာနောဟံ၊ တေဇောဓာတူသု ကောဝိဒေါ၊

သဗ္ဗာသဝေ ပရိညာယ၊ ဝိဟရာမိ အနာသဝေါ.

၃၀. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သာဂတော ထေရော ဣမာ ဂါထာယော အဘာသိတ္ထာတိ.

သာဂတတ္ထေရဿာပဒါနံ ဒုတိယံ.