၁. ကုဏ္ဍဓာနတ္ထေရအပဒါနံ

၁. ‘‘သတ္တာဟံ ပဋိသလ္လီနံ၊ သယမ္ဘုံ အဂ္ဂပုဂ္ဂလံ၊

ပသန္နစိတ္တော သုမနော၊ ဗုဒ္ဓသေဋ္ဌံ ဥပဋ္ဌဟိံ.

၂. ‘‘ဝုဋ္ဌိတံ ကာလမညာယ၊ ပဒုမုတ္တရံ မဟာမုနိံ၊

မဟန္တိံ ကဒလီကဏ္ဏိံ၊ ဂဟေတွာ ဥပဂစ္ဆဟံ.

၃. ‘‘ပဋိဂ္ဂဟေတွာ [ပဋိဂ္ဂဟေသိ (သျာ. က.)] ဘဂဝါ၊ သဗ္ဗညူ [တံ ဖလံ (သီ.)] လောကနာယကော၊

မမ စိတ္တံ ပသာဒေန္တော၊ ပရိဘုဉ္ဇိ မဟာမုနိ.

၄. ‘‘ပရိဘုဉ္ဇိတွာ သမ္ဗုဒ္ဓေါ၊ သတ္ထဝါဟော အနုတ္တရော၊

သကာသနေ နိသီဒိတွာ၊ ဣမာ ဂါထာ အဘာသထ.

၅. ‘‘‘ယေ စ သန္တိ သမိတာရော [ယေ ဝသန္တိ သမေတာရော (သီ.)]၊ ယက္ခာ ဣမမှိ ပဗ္ဗတေ၊

အရညေ ဘူတဘဗျာနိ [ဘူတဂဏာ သဗ္ဗေ (သျာ.)]၊ သုဏန္တု ဝစနံ မမ’.

၆. ‘‘ယော သော ဗုဒ္ဓံ ဥပဋ္ဌာသိ၊ မိဂရာဇံဝ ကေသရိံ [မိဂရာဇာဝ ကေသရီ (သီ.)]၊

တမဟံ ကိတ္တယိဿာမိ၊ သုဏာထ မမ ဘာသတော.

၇. ‘‘‘ဧကာဒသဉ္စက္ခတ္တုံ၊ သော [သောယမေကာဒသက္ခတ္တုံ (သီ.)] ဒေဝရာဇာ ဘဝိဿတိ၊

စတုတိံသတိက္ခတ္တုဉ္စ၊ စက္ကဝတ္တီ ဘဝိဿတိ.

၈. ‘‘‘ကပ္ပသတသဟဿမှိ၊ ဩက္ကာကကုလသမ္ဘဝေါ၊

ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ.

၉. ‘‘‘အက္ကောသိတွာန သမဏေ၊ သီလဝန္တေ အနာသဝေ၊

ပါပကမ္မဝိပါကေန၊ နာမဓေယျံ လဘိဿတိ [ဘဝိဿတိ (က.)].

၁၀. ‘‘‘တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော၊

ကုဏ္ဍဓာနောတိ နာမေန၊ သာဝကော သော ဘဝိဿတိ’.

၁၁. ‘‘ပဝိဝေကမနုယုတ္တော၊ ဈာယီ ဈာနရတော အဟံ၊

တောသယိတွာန သတ္ထာရံ၊ ဝိဟရာမိ အနာသဝေါ.

၁၂. ‘‘သာဝကေဟိ [သာဝကဂ္ဂေဟိ (သီ.)] ပရိဝုတော၊ ဘိက္ခုသံဃပုရက္ခတော၊

ဘိက္ခုသံဃေ နိသီဒိတွာ၊ သလာကံ ဂါဟယီ ဇိနော.

၁၃. ‘‘ဧကံသံ စီဝရံ ကတွာ၊ ဝန္ဒိတွာ လောကနာယကံ၊

ဝဒတံ ဝရဿ ပုရတော၊ ပဌမံ အဂ္ဂဟေသဟံ.

၁၄. ‘‘တေန ကမ္မေန ဘဂဝါ၊ ဒသသဟဿီကမ္ပကော၊

ဘိက္ခုသံဃေ နိသီဒိတွာ၊ အဂ္ဂဋ္ဌာနေ ဌပေသိ မံ.

၁၅. ‘‘ဝီရိယံ မေ ဓုရဓောရယှံ၊ ယောဂက္ခေမာဓိဝါဟနံ၊

ဓာရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ.

၁၆. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ကုဏ္ဍဓာနော ထေရော ဣမာ ဂါထာယော အဘာသိတ္ထာတိ.

ကုဏ္ဍဓာနတ္ထေရဿာပဒါနံ ပဌမံ.