၂. ပါဋလိပုပ္ဖိယတ္ထေရအပဒါနံ

၆. ‘‘ဝိပဿီ နာမ ဘဂဝါ၊ သယမ္ဘူ အဂ္ဂပုဂ္ဂလော၊

ပုရက္ခတော သသိဿေဟိ၊ ပါဝိသိ ဗန္ဓုမံ ဇိနော.

၇. ‘‘တီဏိ ပါဋလိပုပ္ဖါနိ၊ ဥစ္ဆင်္ဂေ ဌပိတာနိ မေ၊

သီသံ နှာယိတုကာမောဝ၊ နဒီတိတ္ထံ အဂစ္ဆဟံ.

၈. ‘‘နိက္ခမ္မ ဗန္ဓုမတိယာ၊ အဒ္ဒသံ လောကနာယကံ၊

ဣန္ဒီဝရံဝ ဇလိတံ၊ အာဒိတ္တံဝ ဟုတာသနံ.

၉. ‘‘ဗျဂ္ဃူသဘံဝ ပဝရံ၊ အဘိဇာတံဝ ကေသရိံ၊

ဂစ္ဆန္တံ သမဏာနဂ္ဂံ၊ ဘိက္ခုသံဃပုရက္ခတံ.

၁၀. ‘‘တသ္မိံ ပသန္နော [သမဏေ (က.)] သုဂတေ၊ ကိလေသမလဓောဝနေ၊

ဂဟေတွာ တီဏိ ပုပ္ဖါနိ၊ ဗုဒ္ဓသေဋ္ဌံ အပူဇယိံ.

၁၁. ‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၁၂. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပါဋလိပုပ္ဖိယော ထေရော ဣမာ ဂါထာယော အဘာသိတ္ထာတိ.

ပါဋလိပုပ္ဖိယတ္ထေရဿာပဒါနံ ဒုတိယံ.