၁၀. ကာသုမာရိဖလဒါယကတ္ထေရအပဒါနံ

၅၃. ‘‘ကဏိကာရံဝ ဇောတန္တံ၊ နိသိန္နံ ပဗ္ဗတန္တရေ၊

အဒ္ဒသံ ဝိရဇံ ဗုဒ္ဓံ၊ လောကဇေဋ္ဌံ နရာသဘံ.

၅၄. ‘‘ပသန္နစိတ္တော သုမနော၊ သိရေ ကတွာန အဉ္ဇလိံ၊

ကာသုမာရိဖလံ ဂယှ၊ ဗုဒ္ဓသေဋ္ဌဿဒါသဟံ.

၅၅. ‘‘ဧကတ္တိံသေ ဣတော ကပ္ပေ၊ ယံ ဖလမဒဒိံ အဟံ၊

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ.

၅၆. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၅၇. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၅၈. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ကာသုမာရိဖလဒါယကော ထေရော ဣမာ ဂါထာယော အဘာသိတ္ထာတိ.

ကာသုမာရိဖလဒါယကတ္ထေရဿာပဒါနံ ဒသမံ.

ဗောဓိဝန္ဒနဝဂ္ဂေါ အဋ္ဌတိံသတိမော.