၈. ဧကစမ္ပကပုပ္ဖိယတ္ထေရအပဒါနံ

၂၇. ‘‘ဥပသန္တော စ သမ္ဗုဒ္ဓေါ၊ ဝသတီ ပဗ္ဗတန္တရေ၊

ဧကစမ္ပကမာဒါယ၊ ဥပဂစ္ဆိံ နရုတ္တမံ.

၂၈. ‘‘ပသန္နစိတ္တော သုမနော၊ ပစ္စေကမုနိမုတ္တမံ၊

ဥဘောဟတ္ထေဟိ ပဂ္ဂယှ၊ ပူဇယိံ အပရာဇိတံ.

၂၉. ‘‘ပဉ္စသဋ္ဌိမှိတော ကပ္ပေ၊ ယံ ပုပ္ဖမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၃၀. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဧကစမ္ပကပုပ္ဖိယော ထေရော ဣမာ ဂါထာယော အဘာသိတ္ထာတိ.

ဧကစမ္ပကပုပ္ဖိယတ္ထေရဿာပဒါနံ အဋ္ဌမံ.