၃. ဘိသမုဠာလဒါယကတ္ထေရအပဒါနံ

၈. ‘‘ဖုဿော နာမာသိ သမ္ဗုဒ္ဓေါ၊ သဗ္ဗဓမ္မာန ပါရဂူ၊

ဝိဝေကကာမော သဗ္ဗညူ [သပ္ပညော (သီ. သျာ.)]၊ အာဂဉ္ဆိ မမ သန္တိကေ.

၉. ‘‘တသ္မိံ စိတ္တံ ပသာဒေတွာ၊ မဟာကာရုဏိကေ ဇိနေ၊

ဘိသမုဠာလံ ပဂ္ဂယှ၊ ဗုဒ္ဓသေဋ္ဌဿဒါသဟံ.

၁၀. ‘‘ဒွေနဝုတေ ဣတော ကပ္ပေ၊ ယံ ဘိသမဒဒိံ တဒါ၊

ဒုဂ္ဂတိံ နာဘိဇာနာမိ၊ ဘိသဒါနဿိဒံ ဖလံ.

၁၁. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဘိသမုဠာလဒါယကော ထေရော ဣမာ ဂါထာယော အဘာသိတ္ထာတိ.

ဘိသမုဠာလဒါယကတ္ထေရဿာပဒါနံ တတိယံ.