၄. ကေသရပုပ္ဖိယတ္ထေရအပဒါနံ

၁၂. ‘‘ဝိဇ္ဇာဓရော တဒါ အာသိံ၊ ဟိမဝန္တမှိ ပဗ္ဗတေ၊

အဒ္ဒသံ ဝိရဇံ ဗုဒ္ဓံ၊ စင်္ကမန္တံ မဟာယသံ.

၁၃. ‘‘တီဏိ ကေသရပုပ္ဖါနိ [ကေသရိပုပ္ဖါနိ (သီ.)]၊ သီသေ ကတွာနဟံ တဒါ၊

ဥပသင်္ကမ္မ သမ္ဗုဒ္ဓံ၊ ဝေဿဘုံ အဘိပူဇယိံ.

၁၄. ‘‘ဧကတ္တိံသေ ဣတော ကပ္ပေ၊ ယံ ကမ္မမကရိံ တဒါ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၁၅. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ကေသရပုပ္ဖိယော ထေရော ဣမာ ဂါထာယော အဘာသိတ္ထာတိ.

ကေသရပုပ္ဖိယတ္ထေရဿာပဒါနံ စတုတ္ထံ.