၇. သုပုဋကပူဇကတ္ထေရအပဒါနံ

၂၆. ‘‘ဒိဝါဝိဟာရာ နိက္ခန္တော၊ ဝိပဿီ လောကနာယကော၊

ဘိက္ခာယ ဝိစရန္တော သော၊ မမ သန္တိကုပါဂမိ.

၂၇. ‘‘တတော ပတီတော သုမနော၊ ဗုဒ္ဓသေဋ္ဌဿ တာဒိနော၊

လောဏသုပုဋကံ ဒတွာ၊ ကပ္ပံ သဂ္ဂမှိ မောဒဟံ.

၂၈. ‘‘ဧကနဝုတိတော ကပ္ပေ၊ ယံ ပုဋကမဒါသဟံ၊

ဒုဂ္ဂတိံ နာဘိဇာနာမိ၊ ပုဋကဿ ဣဒံ ဖလံ.

၂၉. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သုပုဋကပူဇကော ထေရော ဣမာ ဂါထာယော အဘာသိတ္ထာတိ.

သုပုဋကပူဇကတ္ထေရဿာပဒါနံ သတ္တမံ.