၄. သကောသကကောရဏ္ဍဒါယကတ္ထေရအပဒါနံ

၁၄. ‘‘အက္ကန္တဉ္စ ပဒံ ဒိသွာ၊ သိခိနော လောကဗန္ဓုနော၊

ဧကံသံ အဇိနံ ကတွာ၊ ပဒသေဋ္ဌံ အဝန္ဒဟံ.

၁၅. ‘‘ကောရဏ္ဍံ ပုပ္ဖိတံ ဒိသွာ၊ ပါဒပံ ဓရဏီရုဟံ၊

သကောသကံ [သကောဋကံ (သီ. သျာ.)] ဂဟေတွာန၊ ပဒစက္ကံ အပူဇယိံ.

၁၆. ‘‘ဧကတ္တိံသေ ဣတော ကပ္ပေ၊ ယံ ကမ္မမကရိံ တဒါ၊

ဒုဂ္ဂတိံ နာဘိဇာနာမိ၊ ပဒပူဇာယိဒံ ဖလံ.

၁၇. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သကောသက [သကောဋက (သီ. သျာ.)] ကောရဏ္ဍဒါယကော ထေရော ဣမာ ဂါထာယော အဘာသိတ္ထာတိ.

သကောသကကောရဏ္ဍဒါယကတ္ထေရဿာပဒါနံ စတုတ္ထံ.