၅. ဒဏ္ဍဒါယကတ္ထေရအပဒါနံ

၁၈. ‘‘ကာနနံ ဝနမောဂယှ၊ ဝေဠုံ ဆေတွာနဟံ တဒါ၊

အာလမ္ဗနံ ကရိတွာန၊ သံဃဿ အဒဒံ အဟံ.

၁၉. ‘‘တေန စိတ္တပ္ပသာဒေန၊ သုဗ္ဗတေ အဘိဝါဒိယ၊

အာလမ္ဗနမ္ပိ ဒတွာန၊ ပက္ကာမိံ ဥတ္တရာမုခေါ.

၂၀. ‘‘စတုန္နဝုတိတော ကပ္ပေ၊ ယံ ဒဏ္ဍမဒဒိံ တဒါ၊

ဒုဂ္ဂတိံ နာဘိဇာနာမိ၊ ဒဏ္ဍဒါနဿိဒံ ဖလံ.

၂၁. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဒဏ္ဍဒါယကော ထေရော ဣမာ ဂါထာယော အဘာသိတ္ထာတိ.

ဒဏ္ဍဒါယကတ္ထေရဿာပဒါနံ ပဉ္စမံ.