၁. သဒ္ဒသညကတ္ထေရအပဒါနံ

၁. ‘‘မိဂလုဒ္ဒေါ ပုရေ အာသိံ၊ အရညေ ကာနနေ အဟံ၊

တတ္ထဒ္ဒသာသိံ သမ္ဗုဒ္ဓံ၊ ဒေဝသံဃပုရက္ခတံ.

၂. ‘‘စတုသစ္စံ ပကာသေန္တံ၊ ဥဒ္ဓရန္တံ မဟာဇနံ၊

အဿောသိံ မဓုရံ ဝါစံ၊ ကရဝီကရုဒေါပမံ [ရုတောပမံ (?)].

၃. ‘‘ဗြဟ္မသရဿ မုနိနော၊ သိခိနော လောကဗန္ဓုနော၊

ဃောသေ စိတ္တံ ပသာဒေတွာ၊ ပတ္တောမှိ အာသဝက္ခယံ.

၄. ‘‘ဧကတ္တိံသေ ဣတော ကပ္ပေ၊ ယံ ကမ္မမကရိံ တဒါ၊

ဒုဂ္ဂတိံ နာဘိဇာနာမိ၊ ပသာဒဿ ဣဒံ ဖလံ.

၅. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သဒ္ဒသညကော ထေရော ဣမာ ဂါထာယော အဘာသိတ္ထာတိ.

သဒ္ဒသညကတ္ထေရဿာပဒါနံ ပဌမံ.