၉. တိန္ဒုကဖလဒါယကတ္ထေရအပဒါနံ

၅၉. ‘‘ကဏိကာရံဝ ဇောတန္တံ၊ နိသိန္နံ ပဗ္ဗတန္တရေ၊

အဒ္ဒသံ ဝိရဇံ ဗုဒ္ဓံ၊ ဩဃတိဏ္ဏမနာသဝံ.

၆၀. ‘‘တိန္ဒုကံ သဖလံ ဒိသွာ၊ ဘိန္ဒိတွာန သကောသကံ [သကောဋကံ (သီ.)၊ သကောဋိကံ (သျာ.)]၊

ပသန္နစိတ္တော သုမနော၊ သယမ္ဘုဿ မဒါသဟံ [ဝေဿဘုဿ အဒါသဟံ (သီ.)].

၆၁. ‘‘ဧကနဝုတိတော ကပ္ပေ၊ ယံ ဖလမဒဒိံ တဒါ၊

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ.

၆၂. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ တိန္ဒုကဖလဒါယကော ထေရော ဣမာ ဂါထာယော အဘာသိတ္ထာတိ.

တိန္ဒုကဖလဒါယကတ္ထေရဿာပဒါနံ နဝမံ.