၁၀. ဧကဉ္ဇလိယတ္ထေရအပဒါနံ

၆၃. ‘‘ရောမသော [ရေဝတော (သီ.)] နာမ သမ္ဗုဒ္ဓေါ၊ နဒီကူလေ ဝသီ တဒါ၊

အဒ္ဒသံ ဝိရဇံ ဗုဒ္ဓံ၊ ပီတရံသိံဝ ဘာဏုမံ.

၆၄. ‘‘ဥက္ကာမုခပဟဋ္ဌံဝ၊ ခဒိရင်္ဂါရသန္နိဘံ၊

ဩသဓိံဝ ဝိရောစန္တံ၊ ဧကဉ္ဇလိမကာသဟံ.

၆၅. ‘‘စတုန္နဝုတိတော ကပ္ပေ၊ ယံ အဉ္ဇလိမကာသဟံ၊

ဒုဂ္ဂတိံ နာဘိဇာနာမိ၊ အဉ္ဇလိယာ ဣဒံ ဖလံ.

၆၆. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဧကဉ္ဇလိယော ထေရော ဣမာ ဂါထာယော အဘာသိတ္ထာတိ.

ဧကဉ္ဇလိယတ္ထေရဿာပဒါနံ ဒသမံ.

ဧကပဒုမိယဝဂ္ဂေါ ပဉ္စတိံသတိမော.