၆. စမ္ပကပုပ္ဖိယတ္ထေရအပဒါနံ

၃၉. ‘‘ဟိမဝန္တဿာဝိဒူရေ၊ ဇာပလော [စာပလော (သီ.)၊ ဆာပလော (သျာ.)] နာမ ပဗ္ဗတော၊

ဗုဒ္ဓေါ သုဒဿနော နာမ၊ ဝိဟာသိ ပဗ္ဗတန္တရေ.

၄၀. ‘‘ပုပ္ဖံ ဟေမဝန္တံ [ဟေမဝတံ (သီ.)၊ ဟေမဝဏ္ဏံ (သျာ.)] ဂယှ၊ ဂစ္ဆံ ဝေဟာယသေနဟံ၊

အဒ္ဒသံ ဝိရဇံ ဗုဒ္ဓံ၊ ဩဃတိဏ္ဏမနာသဝံ.

၄၁. ‘‘သတ္တ စမ္ပကပုပ္ဖါနိ၊ သီသေ ကတွာနဟံ တဒါ၊

ဗုဒ္ဓဿ အဘိရောပေသိံ၊ သယမ္ဘုဿ မဟေသိနော.

၄၂. ‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၄၃. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ စမ္ပကပုပ္ဖိယော ထေရော ဣမာ ဂါထာယော အဘာသိတ္ထာတိ.

စမ္ပကပုပ္ဖိယတ္ထေရဿာပဒါနံ ဆဋ္ဌံ.