၅. နဠာဂါရိကတ္ထေရအပဒါနံ

၃၁. ‘‘ဟိမဝန္တဿာဝိဒူရေ၊ ဟာရိတော နာမ ပဗ္ဗတော၊

သယမ္ဘူ နာရဒေါ နာမ၊ ရုက္ခမူလေ ဝသီ တဒါ.

၃၂. ‘‘နဠာဂါရံ ကရိတွာန၊ တိဏေန ဆာဒယိံ အဟံ၊

စင်္ကမံ သောဓယိတွာန၊ သယမ္ဘုဿ အဒါသဟံ.

၃၃. ‘‘စတုဒ္ဒသသု ကပ္ပေသု၊ ဒေဝလောကေ ရမိံ အဟံ၊

စတုသတ္တတိက္ခတ္တုဉ္စ၊ ဒေဝရဇ္ဇံ အကာရယိံ.

၃၄. ‘‘စတုသတ္တတိ [သတ္တသတ္တတိ (သီ.)] က္ခတ္တုဉ္စ၊ စက္ကဝတ္တီ အဟောသဟံ၊

ပဒေသရဇ္ဇံ ဝိပုလံ၊ ဂဏနာတော အသင်္ခိယံ.

၃၅. ‘‘ဥဗ္ဗိဒ္ဓံ ဘဝနံ မယှံ၊ ဣန္ဒလဋ္ဌီဝ ဥဂ္ဂတံ၊

သဟဿထမ္ဘံ အတုလံ၊ ဝိမာနံ သပဘဿရံ.

၃၆. ‘‘ဒွေ သမ္ပတ္တီ အနုဘောတွာ၊ သုက္ကမူလေန စောဒိတော၊

ဂေါတမဿ ဘဂဝတော၊ သာသနေ ပဗ္ဗဇိံ အဟံ.

၃၇. ‘‘ပဓာနပဟိတတ္တောမှိ၊ ဥပသန္တော နိရူပဓိ၊

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ.

၃၈. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ နဠာဂါရိကော ထေရော ဣမာ ဂါထာယော အဘာသိတ္ထာတိ.

နဠာဂါရိကတ္ထေရဿာပဒါနံ ပဉ္စမံ.