၉. ကန္ဒလိပုပ္ဖိယတ္ထေရအပဒါနံ

၄၇. ‘‘သိန္ဓုယာ နဒိယာ တီရေ၊ အဟောသိံ ကဿကော တဒါ၊

ပရကမ္မာယနေ ယုတ္တော၊ ပရဘတ္တံ အပဿိတော.

၄၈. ‘‘သိန္ဓုံ အနုစရန္တောဟံ၊ သိဒ္ဓတ္ထံ ဇိနမဒ္ဒသံ၊

သမာဓိနာ နိသိန္နံဝ၊ သတပတ္တံဝ ပုပ္ဖိတံ.

၄၉. ‘‘သတ္တ ကန္ဒလိပုပ္ဖါနိ၊ ဝဏ္ဋေ ဆေတွာနဟံ တဒါ၊

မတ္ထကေ အဘိရောပေသိံ၊ ဗုဒ္ဓဿာဒိစ္စဗန္ဓုနော.

၅၀. ‘‘သုဝဏ္ဏဝဏ္ဏံ သမ္ဗုဒ္ဓံ၊ အနုကူလေ သမာဟိတံ၊

တိဓာပဘိန္နမာတင်္ဂံ၊ ကုဉ္ဇရံဝ ဒုရာသဒံ.

၅၁. ‘‘တမဟံ ဥပဂန္တွာန၊ နိပကံ ဘာဝိတိန္ဒြိယံ၊

အဉ္ဇလိံ ပဂ္ဂဟေတွာန၊ အဝန္ဒိံ သတ္ထုနော အဟံ.

၅၂. ‘‘စတုန္နဝုတိတော ကပ္ပေ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၅၃. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ကန္ဒလိပုပ္ဖိယော ထေရော ဣမာ ဂါထာယော အဘာသိတ္ထာတိ.

ကန္ဒလိပုပ္ဖိယတ္ထေရဿာပဒါနံ နဝမံ.