၈. တိရံသိယတ္ထေရအပဒါနံ

၃၉. ‘‘ကေသရိံ အဘိဇာတံဝ၊ အဂ္ဂိက္ခန္ဓံဝ ပဗ္ဗတေ၊

ဩဘာသေန္တံ ဒိသာ သဗ္ဗာ [နိဝါသေန္တံ (က.)၊ ဒိသာသိန္နံ (သျာ.)]၊ သိဒ္ဓတ္ထံ ပဗ္ဗတန္တရေ.

၄၀. ‘‘သူရိယဿ စ အာလောကံ၊ စန္ဒာလောကံ တထေဝ စ၊

ဗုဒ္ဓါလောကဉ္စ ဒိသွာန၊ ဝိတ္တိ မေ ဥဒပဇ္ဇထ.

၄၁. ‘‘တယော အာလောကေ ဒိသွာန၊ သမ္ဗုဒ္ဓံ [ဗုဒ္ဓဉ္စ (သီ.)] သာဝကုတ္တမံ၊

ဧကံသံ အဇိနံ ကတွာ၊ သန္ထဝိံ လောကနာယကံ.

၄၂. ‘‘တယော ဟိ အာလောကကရာ၊ လောကေ လောကတမောနုဒါ၊

စန္ဒော စ သူရိယော စာပိ၊ ဗုဒ္ဓေါ စ လောကနာယကော.

၄၃. ‘‘ဩပမ္မံ ဥပဒဿေတွာ၊ ကိတ္တိတော မေ မဟာမုနိ၊

ဗုဒ္ဓဿ ဝဏ္ဏံ ကိတ္တေတွာ၊ ကပ္ပံ သဂ္ဂမှိ မောဒဟံ.

၄၄. ‘‘စတုန္နဝုတိတော ကပ္ပေ၊ ယံ ဗုဒ္ဓမဘိကိတ္တယိံ၊

ဒုဂ္ဂတိံ နာဘိဇာနာမိ၊ ကိတ္တနာယ ဣဒံ ဖလံ.

၄၅. ‘‘ဧကသဋ္ဌိမှိတော ကပ္ပေ၊ ဧကော ဉာဏဓရော အဟု၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၄၆. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ တိရံသိယော ထေရော ဣမာ ဂါထာယော အဘာသိတ္ထာတိ.

တိရံသိယတ္ထေရဿာပဒါနံ အဋ္ဌမံ.