၆. အာသနသန္ထဝိကတ္ထေရအပဒါနံ

၂၆. ‘‘စေတိယံ ဥတ္တမံ နာမ၊ သိခိနော လောကဗန္ဓုနော၊

အရညေ ဣရီဏေ ဝနေ၊ အန္ဓာဟိဏ္ဍာမဟံ တဒါ.

၂၇. ‘‘ပဝနာ နိက္ခမန္တေန၊ ဒိဋ္ဌံ သီဟာသနံ မယာ၊

ဧကံသံ အဉ္ဇလိံ ကတွာ၊ သန္ထဝိံ [ထဝိဿံ (သီ.)] လောကနာယကံ.

၂၈. ‘‘ဒိဝသဘာဂံ ထဝိတွာန၊ ဗုဒ္ဓံ လောကဂ္ဂနာယကံ၊

ဟဋ္ဌော ဟဋ္ဌေန စိတ္တေန၊ ဣမံ ဝါစံ ဥဒီရယိံ.

၂၉. ‘‘‘နမော တေ ပုရိသာဇည၊ နမော တေ ပုရိသုတ္တမ၊

သဗ္ဗညူသိ မဟာဝီရ၊ လောကဇေဋ္ဌ နရာသဘ’.

၃၀. ‘‘အဘိတ္ထဝိတွာ သိခိနံ၊ နိမိတ္တကရဏေနဟံ၊

အာသနံ အဘိဝါဒေတွာ၊ ပက္ကာမိံ ဥတ္တရာမုခေါ.

၃၁. ‘‘ဧကတ္တိံသေ ဣတော ကပ္ပေ၊ ယံ ထဝိံ ဝဒတံ ဝရံ၊

ဒုဂ္ဂတိံ နာဘိဇာနာမိ၊ ထောမနာယ ဣဒံ ဖလံ.

၃၂. ‘‘သတ္တဝီသေ ဣတော ကပ္ပေ၊ အတုလာ သတ္တ အာသု တေ၊

သတ္တရတနသမ္ပန္နာ၊ စက္ကဝတ္တီ မဟဗ္ဗလာ.

၃၃. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အာသနသန္ထဝိကော [အာသနသန္ထဝကော (?)၊ အာသနထဝိကော (က.)၊ အာသနတ္ထဝိကော (သီ. သျာ.)] ထေရော ဣမာ ဂါထာယော အဘာသိတ္ထာတိ.

အာသနသန္ထဝိကတ္ထေရဿာပဒါနံ ဆဋ္ဌံ.