၂. ဘောဇနဒါယကတ္ထေရအပဒါနံ

၄. ‘‘သုဇာတော သာလလဋ္ဌီဝ၊ သောဘဉ္ဇနမိဝုဂ္ဂတော၊

ဣန္ဒလဋ္ဌိရိဝါကာသေ၊ ဝိရောစတိ သဒါ ဇိနော.

၅. ‘‘တဿ ဒေဝါတိဒေဝဿ၊ ဝေဿဘုဿ မဟေသိနော၊

အဒါသိ ဘောဇနမဟံ၊ ဝိပ္ပသန္နေန စေတသာ.

၆. ‘‘တံ မေ ဗုဒ္ဓေါ အနုမောဒိ၊ သယမ္ဘူ အပရာဇိတော၊

ဘဝေ နိဗ္ဗတ္တမာနမှိ၊ ဖလံ နိဗ္ဗတ္တတူ တဝ.

၇. ‘‘ဧကတ္တိံသေ ဣတော ကပ္ပေ၊ ယံ ဒါနမဒဒိံ တဒါ၊

ဒုဂ္ဂတိံ နာဘိဇာနာမိ၊ ဘောဇနဿ ဣဒံ ဖလံ.

၈. ‘‘ပဉ္စဝီသေ ဣတော ကပ္ပေ၊ ဧကော အာသိံ အမိတ္တကော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၉. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဘောဇနဒါယကော ထေရော ဣမာ ဂါထာယော အဘာသိတ္ထာတိ.

ဘောဇနဒါယကတ္ထေရဿာပဒါနံ ဒုတိယံ.