၃. ဂတသညကတ္ထေရအပဒါနံ

၁၀. ‘‘အာကာသေဝ ပဒံ နတ္ထိ၊ အမ္ဗရေ အနိလဉ္ဇသေ၊

သိဒ္ဓတ္ထံ ဇိနမဒ္ဒက္ခိံ၊ ဂစ္ဆန္တံ တိဒိဝင်္ဂဏေ [တိဒိဝင်္ဂဏံ (သျာ. က.)].

၁၁. ‘‘အနိလေနေရိတံ ဒိသွာ၊ သမ္မာသမ္ဗုဒ္ဓစီဝရံ၊

ဝိတ္တိ မမာဟု တာဝဒေ [ဝိတ္တိ မေ ပါဟုဏာ တာဝ (သျာ.)၊ ဝိတ္တိ မေ တာဝဒေ ဇာတာ (သီ.)]၊ ဒိသွာန ဂမနံ မုနိံ [မုနေ (သီ.)].

၁၂. ‘‘စတုန္နဝုတိတော ကပ္ပေ၊ ယံ သညမလဘိံ တဒါ၊

ဒုဂ္ဂတိံ နာဘိဇာနာမိ၊ ဗုဒ္ဓသညာယိဒံ ဖလံ.

၁၃. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဂတသညကော ထေရော ဣမာ ဂါထာယော အဘာသိတ္ထာတိ.

ဂတသညကတ္ထေရဿာပဒါနံ တတိယံ.