၈. အနုလေပဒါယကတ္ထေရအပဒါနံ

၃၉. ‘‘အတ္ထဒဿိဿ မုနိနော၊ အဒ္ဒသံ သာဝကံ အဟံ၊

နဝကမ္မံ ကရောန္တဿ၊ သီမာယ ဥပဂစ္ဆဟံ.

၄၀. ‘‘နိဋ္ဌိတေ နဝကမ္မေ စ၊ အနုလေပမဒါသဟံ၊

ပသန္နစိတ္တော သုမနော၊ ပုညက္ခေတ္တေ အနုတ္တရေ.

၄၁. ‘‘အဋ္ဌာရသေ ကပ္ပသတေ၊ ယံ ကမ္မမကရိံ တဒါ၊

ဒုဂ္ဂတိံ နာဘိဇာနာမိ၊ အနုလေပဿိဒံ ဖလံ.

၄၂. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အနုလေပဒါယကော ထေရော ဣမာ ဂါထာယော အဘာသိတ္ထာတိ.

အနုလေပဒါယကတ္ထေရဿာပဒါနံ အဋ္ဌမံ.