၇. အာရာမဒါယကတ္ထေရအပဒါနံ

၃၂. ‘‘သိဒ္ဓတ္ထဿ ဘဂဝတော၊ အာရာမော ရောပိတော မယာ၊

သန္ဒစ္ဆာယေသု [သီတဆာယေသု (သျာ.)၊ သန္တစ္ဆာယေသု (က.)] ရုက္ခေသု၊ ဥပါသန္တေသု ပက္ခိသု.

၃၃. ‘‘အဒ္ဒသံ ဝိရဇံ ဗုဒ္ဓံ၊ အာဟုတီနံ ပဋိဂ္ဂဟံ၊

အာရာမံ အဘိနာမေသိံ၊ လောကဇေဋ္ဌံ နရာသဘံ.

၃၄. ‘‘ဟဋ္ဌော ဟဋ္ဌေန စိတ္တေန၊ ဖလံ ပုပ္ဖမဒါသဟံ၊

တတော ဇာတပ္ပသာဒေါဝ၊ တံ ဝနံ ပရိဏာမယိံ.

၃၅. ‘‘ဗုဒ္ဓဿ ယမိဒံ ဒါသိံ၊ ဝိပ္ပသန္နေန စေတသာ၊

ဘဝေ နိဗ္ဗတ္တမာနမှိ၊ နိဗ္ဗတ္တတိ ဖလံ မမ.

၃၆. ‘‘စတုန္နဝုတိတော ကပ္ပေ၊ ယံ အာရာမမဒံ တဒါ၊

ဒုဂ္ဂတိံ နာဘိဇာနာမိ၊ အာရာမဿ ဣဒံ ဖလံ.

၃၇. ‘‘သတ္တတိံသေ ဣတော ကပ္ပေ၊ သတ္တာသုံ မုဒုသီတလာ၊

သတ္တရတနသမ္ပန္နာ၊ စက္ကဝတ္တီ မဟဗ္ဗလာ.

၃၈. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အာရာမဒါယကော ထေရော ဣမာ ဂါထာယော အဘာသိတ္ထာတိ.

အာရာမဒါယကတ္ထေရဿာပဒါနံ သတ္တမံ.