၂. သဗ္ဗဂန္ဓိယတ္ထေရအပဒါနံ

၅. ‘‘ဂန္ဓမာလံ မယာ ဒိန္နံ၊ ဝိပဿိဿ မဟေသိနော၊

အဒါသိံ ဥဇုဘူတဿ၊ ကောသေယျဝတ္ထမုတ္တမံ.

၆. ‘‘ဧကနဝုတိတော ကပ္ပေ၊ ယံ ဝတ္ထမဒဒိံ [ဂန္ဓမဒဒိံ (သျာ.)] ပုရေ၊

ဒုဂ္ဂတိံ နာဘိဇာနာမိ၊ ဂန္ဓဒါနဿိဒံ ဖလံ.

၇. ‘‘ဣတော ပန္နရသေ ကပ္ပေ၊ သုစေဠော နာမ ခတ္တိယော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၈. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သဗ္ဗဂန္ဓိယော ထေရော ဣမာ ဂါထာယော အဘာသိတ္ထာတိ.

သဗ္ဗဂန္ဓိယတ္ထေရဿာပဒါနံ ဒုတိယံ.