၃. ပရမန္နဒါယကတ္ထေရအပဒါနံ

၉. ‘‘ကဏိကာရံဝ ဇောတန္တံ၊ ဥဒယန္တံဝ ဘာဏုမံ၊

ဝိပဿိံ အဒ္ဒသံ ဗုဒ္ဓံ၊ လောကဇေဋ္ဌံ နရာသဘံ.

၁၀. ‘‘အဉ္ဇလိံ ပဂ္ဂဟေတွာန၊ အဘိနေသိံ သကံ ဃရံ၊

အဘိနေတွာန သမ္ဗုဒ္ဓံ၊ ပရမန္နမဒါသဟံ.

၁၁. ‘‘ဧကနဝုတိတော ကပ္ပေ၊ ပရမန္နမဒိံ [ပရမန္နံ ဒဒိံ (သီ.)၊ ပရမန္နမဒံ (သျာ.)] တဒါ၊

ဒုဂ္ဂတိံ နာဘိဇာနာမိ၊ ပရမန္နဿိဒံ ဖလံ.

၁၂. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပရမန္နဒါယကော ထေရော ဣမာ ဂါထာယော အဘာသိတ္ထာတိ.

ပရမန္နဒါယကတ္ထေရဿာပဒါနံ တတိယံ.