၁. ပဒုမကေသရိယတ္ထေရအပဒါနံ

၁. ‘‘ဣသိသံဃေ အဟံ ပုဗ္ဗေ၊ အာသိံ မာတင်္ဂဝါရဏော၊

မဟေသီနံ ပသာဒေန၊ ပဒ္မကေသရမောကိရိံ.

၂. ‘‘ပစ္စေကဇိနသေဋ္ဌေသု၊ ဓုတရာဂေသု တာဒိသု၊

တေသု စိတ္တံ ပသာဒေတွာ၊ ကပ္ပံ သဂ္ဂမှိ မောဒဟံ.

၃. ‘‘ဧကနဝုတိတော ကပ္ပေ၊ ကေသရံ ဩကိရိံ တဒါ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၄. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပဒုမကေသရိယော ထေရော ဣမာ ဂါထာယော အဘာသိတ္ထာတိ.

ပဒုမကေသရိယတ္ထေရဿာပဒါနံ ပဌမံ.