၇. ဒေသကိတ္တကတ္ထေရအပဒါနံ
၃၁. ‘‘ဥပသာလကနာမောဟံ၊ အဟောသိံ ဗြာဟ္မဏော တဒါ၊
ကာနနံ ဝနမောဂါဠှံ၊ လောကဇေဋ္ဌံ နရာသဘံ.
၃၂. ‘‘ဒိသွာန ဝန္ဒိံ ပါဒေသု၊ လောကာဟုတိပဋိဂ္ဂဟံ၊
ပသန္နစိတ္တံ မံ ဉတွာ၊ ဗုဒ္ဓေါ အန္တရဓာယထ.
၃၃. ‘‘ကာနနာ အဘိနိက္ခမ္မ၊ ဗုဒ္ဓသေဋ္ဌမနုဿရိံ၊
တံ ဒေသံ ကိတ္တယိတွာန၊ ကပ္ပံ သဂ္ဂမှိ မောဒဟံ.
၃၄. ‘‘ဒွေနဝုတေ ဣတော ကပ္ပေ၊ ယံ ဒေသမဘိကိတ္တယိံ၊
ဒုဂ္ဂတိံ နာဘိဇာနာမိ၊ ကိတ္တနာယ ဣဒံ ဖလံ.
၃၅. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.
ဣတ္ထံ သုဒံ အာယသ္မာ ဒေသကိတ္တကော ထေရော ဣမာ ဂါထာယော အဘာသိတ္ထာတိ.
ဒေသကိတ္တကတ္ထေရဿာပဒါနံ သတ္တမံ.