၈. သရဏဂမနိယတ္ထေရအပဒါနံ

၃၆. ‘‘ပဗ္ဗတေ ဟိမဝန္တမှိ၊ အဟောသိံ လုဒ္ဒကော တဒါ၊

ဝိပဿိံ အဒ္ဒသံ ဗုဒ္ဓံ၊ လောကဇေဋ္ဌံ နရာသဘံ.

၃၇. ‘‘ဥပါသိတွာန သမ္ဗုဒ္ဓံ၊ ဝေယျာဝစ္စမကာသဟံ၊

သရဏဉ္စ ဥပါဂစ္ဆိံ၊ ဒွိပဒိန္ဒဿ တာဒိနော.

၃၈. ‘‘ဧကနဝုတိတော ကပ္ပေ၊ သရဏံ ဥပဂစ္ဆဟံ၊

ဒုဂ္ဂတိံ နာဘိဇာနာမိ၊ သရဏာဂမနပ္ဖလံ.

၃၉. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သရဏဂမနိယော ထေရော ဣမာ ဂါထာယော အဘာသိတ္ထာတိ.

သရဏဂမနိယတ္ထေရဿာပဒါနံ အဋ္ဌမံ.