၁. စိတကပူဇကတ္ထေရအပဒါနံ

၁. ‘‘အဇိတော နာမ နာမေန၊ အဟောသိံ ဗြာဟ္မဏော တဒါ၊

အာဟုတိံ ယိဋ္ဌုကာမောဟံ၊ နာနာပုပ္ဖံ သမာနယိံ.

၂. ‘‘ဇလန္တံ စိတကံ ဒိသွာ၊ သိခိနော လောကဗန္ဓုနော၊

တဉ္စ ပုပ္ဖံ သမာနေတွာ၊ စိတကေ ဩကိရိံ အဟံ.

၃. ‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၄. ‘‘သတ္တဝီသေ [သတ္တတိံသေ (က.)] ဣတော ကပ္ပေ၊ သတ္တာသုံ မနုဇာဓိပါ၊

သုပဇ္ဇလိတနာမာ တေ၊ စက္ကဝတ္တီ မဟဗ္ဗလာ.

၅. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ စိတကပူဇကော ထေရော ဣမာ ဂါထာယော အဘာသိတ္ထာတိ.

စိတကပူဇကတ္ထေရဿာပဒါနံ ပဌမံ.