၂. ပုပ္ဖဓာရကတ္ထေရအပဒါနံ
၆. ‘‘ဝါကစီရဓရော အာသိံ၊ အဇိနုတ္တရဝါသနော၊
အဘိညာ ပဉ္စ နိဗ္ဗတ္တာ၊ စန္ဒဿ ပရိမဇ္ဇကော.
၇. ‘‘ဝိပဿိံ လောကပဇ္ဇောတံ၊ ဒိသွာ အဘိဂတံ မမံ၊
ပါရိစ္ဆတ္တကပုပ္ဖါနိ၊ ဓာရေသိံ သတ္ထုနော အဟံ.
၈. ‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ၊
ဒုဂ္ဂတိံ နာဘိဇာနာမိ၊ ဓာရဏာယ ဣဒံ ဖလံ.
၉. ‘‘သတ္တာသီတိမှိတော ကပ္ပေ၊ ဧကော အာသိံ မဟီပတိ၊
သမန္တဓာရဏော နာမ၊ စက္ကဝတ္တီ မဟဗ္ဗလော.
၁၀. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.
ဣတ္ထံ သုဒံ အာယသ္မာ ပုပ္ဖဓာရကော ထေရော ဣမာ ဂါထာယော အဘာသိတ္ထာတိ.
ပုပ္ဖဓာရကတ္ထေရဿာပဒါနံ ဒုတိယံ.