၆. ဓူပဒါယကတ္ထေရအပဒါနံ

၁၆၁. ‘‘သိဒ္ဓတ္ထဿ ဘဂဝတော၊ လောကဇေဋ္ဌဿ တာဒိနော၊

ကုဋိဓူပံ မယာ ဒိန္နံ၊ ဝိပ္ပသန္နေန စေတသာ.

၁၆၂. ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ၊

သဗ္ဗေသမ္ပိ ပိယော ဟောမိ၊ ဓူပဒါနဿိဒံ ဖလံ.

၁၆၃. ‘‘စတုန္နဝုတိတော ကပ္ပေ၊ ယံ ဓူပမဒဒိံ တဒါ [ယံ ဓူပနမဒါသဟံ (က.)]၊

ဒုဂ္ဂတိံ နာဘိဇာနာမိ၊ ဓူပဒါနဿိဒံ ဖလံ.

၁၆၄. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဓူပဒါယကော ထေရော ဣမာ ဂါထာယော အဘာသိတ္ထာတိ.

ဓူပဒါယကတ္ထေရဿာပဒါနံ ဆဋ္ဌံ.