၇. ပုလိနပူဇကတ္ထေရအပဒါနံ

၁၆၅. ‘‘ဝိပဿိဿ ဘဂဝတော၊ ဗောဓိယာ ပါဒပုတ္တမေ၊

ပုရာဏပုလိနံ ဟိတွာ [ဆဍ္ဍေတွာ (သီ. သျာ.)]၊ သုဒ္ဓပုလိနမာကိရိံ.

၁၆၆. ‘‘ဧကနဝုတိတော ကပ္ပေ၊ ယံ ပုလိနမဒါသဟံ၊

ဒုဂ္ဂတိံ နာဘိဇာနာမိ၊ ပုလိနဒါနဿိဒံ ဖလံ.

၁၆၇. ‘‘တိံသတိမေ [တိပညာသေ (သီ. သျာ.)] ဣတော ကပ္ပေ၊ ရာဇာ အာသိံ ဇနာဓိဘူ၊

မဟာပုလိနနာမေန၊ စက္ကဝတ္တီ မဟဗ္ဗလော.

၁၆၈. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပုလိနပူဇကော ထေရော ဣမာ ဂါထာယော အဘာသိတ္ထာတိ.

ပုလိနပူဇကတ္ထေရဿာပဒါနံ သတ္တမံ.