၅. အန္နသံသာဝကတ္ထေရအပဒါနံ

၁၅၅. ‘‘သုဝဏ္ဏဝဏ္ဏံ သမ္ဗုဒ္ဓံ၊ ဂစ္ဆန္တံ အန္တရာပဏေ၊

ကဉ္စနဂ္ဃိယသံကာသံ၊ ဗာတ္တိံသဝရလက္ခဏံ.

၁၅၆. ‘‘သိဒ္ဓတ္ထံ လောကပဇ္ဇောတံ၊ အပ္ပမေယျံ အနောပမံ၊

အလတ္ထံ ပရမံ ပီတိံ၊ ဒိသွာ ဒန္တံ ဇုတိန္ဓရံ.

၁၅၇. ‘‘သမ္ဗုဒ္ဓံ အဘိနာမေတွာ၊ ဘောဇယိံ တံ မဟာမုနိံ၊

မဟာကာရုဏိကော လောကေ [နာထော (သီ.)]၊ အနုမောဒိ မမံ တဒါ.

၁၅၈. ‘‘တသ္မိံ မဟာကာရုဏိကေ၊ ပရမဿာသကာရကေ၊

ဗုဒ္ဓေ စိတ္တံ ပသာဒေတွာ၊ ကပ္ပံ သဂ္ဂမှိ မောဒဟံ.

၁၅၉. ‘‘စတုန္နဝုတိတော ကပ္ပေ၊ ယံ ဒါနမဒဒိံ တဒါ၊

ဒုဂ္ဂတိံ နာဘိဇာနာမိ၊ ဘိက္ခာဒါနဿိဒံ ဖလံ.

၁၆၀. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အန္နသံသာဝကော ထေရော ဣမာ ဂါထာယော အဘာသိတ္ထာတိ.

အန္နသံသာဝကတ္ထေရဿာပဒါနံ ပဉ္စမံ.