၄. ပဉ္စသီလသမာဒါနိယတ္ထေရအပဒါနံ
၁၃၄. ‘‘နဂရေ စန္ဒဝတိယာ၊ ဘတကော အာသဟံ တဒါ၊
ပရကမ္မာယနေ ယုတ္တော၊ ပဗ္ဗဇ္ဇံ န လဘာမဟံ.
၁၃၅. ‘‘မဟန္ဓကာရပိဟိတာ၊ တိဝိဓဂ္ဂီဟိ ဍယှရေ၊
ကေန နု ခေါ ဥပါယေန၊ ဝိသံယုတ္တော ဘဝေ အဟံ.
၁၃၆. ‘‘ဒေယျဓမ္မော စ မေ နတ္ထိ၊ ဝရာကော ဘတကော အဟံ၊
ယံနူနာဟံ ပဉ္စသီလံ၊ ရက္ခေယျံ ပရိပူရယံ.
၁၃၇. ‘‘အနောမဒဿိဿ မုနိနော၊ နိသဘော နာမ သာဝကော၊
တမဟံ ဥပသင်္ကမ္မ၊ ပဉ္စသိက္ခာပဒဂ္ဂဟိံ.
၁၃၈. ‘‘ဝဿသတသဟဿာနိ၊ အာယု ဝိဇ္ဇတိ တာဝဒေ၊
တာဝတာ ပဉ္စသီလာနိ၊ ပရိပုဏ္ဏာနိ ဂေါပယိံ.
၁၃၉. ‘‘မစ္စုကာလေ စ သမ္ပတ္တေ၊ ဒေဝါ အဿာသယန္တိ မံ၊
‘ရထော သဟဿယုတ္တော တေ၊ မာရိသာယံ [မာရိသဿ (က.)] ဥပဋ္ဌိတော’.
၁၄၀. ‘‘ဝတ္တန္တေ စရိမေ စိတ္တေ၊ မမ သီလံ အနုဿရိံ၊
တေန ကမ္မေန သုကတေန၊ တာဝတိံသံ အဂစ္ဆဟံ.
၁၄၁. ‘‘တိံသက္ခတ္တုဉ္စ ဒေဝိန္ဒော၊ ဒေဝရဇ္ဇမကာရယိံ၊
ဒိဗ္ဗသုခံ [ဒိဗ္ဗံ သုခံ (သီ.)] အနုဘဝိံ၊ အစ္ဆရာဟိ ပုရက္ခတော.
၁၄၂. ‘‘ပဉ္စသတ္တတိက္ခတ္တုဉ္စ၊ စက္ကဝတ္တီ အဟောသဟံ၊
ပဒေသရဇ္ဇံ ဝိပုလံ၊ ဂဏနာတော အသင်္ခိယံ.
၁၄၃. ‘‘ဒေဝလောကာ စဝိတွာန၊ သုက္ကမူလေန စောဒိတော၊
ပုရေ ဝေသာလိယံ ဇာတော၊ မဟာသာလေ သုအဍ္ဎကေ.
၁၄၄. ‘‘ဝဿူပနာယိကေ ကာလေ၊ ဒိပ္ပန္တေ [ဒိဗ္ဗန္တိ (က.)] ဇိနသာသနေ၊
မာတာ စ မေ ပိတာ စေဝ၊ ပဉ္စသိက္ခာပဒဂ္ဂဟုံ.
၁၄၅. ‘‘သဟ သုတွာနဟံ သီလံ၊ မမ သီလံ အနုဿရိံ၊
ဧကာသနေ နိသီဒိတွာ၊ အရဟတ္တမပါပုဏိံ.
၁၄၆. ‘‘ဇာတိယာ ပဉ္စဝဿေန၊ အရဟတ္တမပါပုဏိံ၊
ဥပသမ္ပာဒယိ ဗုဒ္ဓေါ၊ ဂုဏမညာယ စက္ခုမာ.
၁၄၇. ‘‘ပရိပုဏ္ဏာနိ ဂေါပေတွာ၊ ပဉ္စသိက္ခာပဒါနဟံ၊
အပရိမေယျေ ဣတော ကပ္ပေ၊ ဝိနိပါတံ န ဂစ္ဆဟံ.
၁၄၈. ‘‘သွာဟံ ယသမနုဘဝိံ၊ တေသံ သီလာန ဝါဟသာ၊
ကပ္ပကောဋိမ္ပိ ကိတ္တေန္တော၊ ကိတ္တယေ ဧကဒေသကံ.
၁၄၉. ‘‘ပဉ္စသီလာနိ ဂေါပေတွာ၊ တယော ဟေတူ လဘာမဟံ၊
ဒီဃာယုကော မဟာဘောဂေါ၊ တိက္ခပညော ဘဝါမဟံ.
၁၅၀. ‘‘သံကိတ္တေန္တော စ [ပကိတ္တေန္တောဝ (သီ.)၊ ပကိတ္တေန္တေ စ (သျာ.)] သဗ္ဗေသံ၊ အဘိမတ္တဉ္စ ပေါရိသံ၊
ဘဝါဘဝေ သံသရိတွာ၊ ဧတေ ဌာနေ လဘာမဟံ.
၁၅၁. ‘‘အပရိမေယျသီလေသု၊ ဝတ္တန္တာ ဇိနသာဝကာ၊
ဘဝေသု ယဒိ ရဇ္ဇေယျုံ၊ ဝိပါကော ကီဒိသော ဘဝေ.
၁၅၂. ‘‘သုစိဏ္ဏံ မေ ပဉ္စသီလံ၊ ဘတကေန တပဿိနာ [ဝိပဿိနာ (သီ.)]၊
တေန သီလေနဟံ အဇ္ဇ၊ မောစယိံ သဗ္ဗဗန္ဓနာ.
၁၅၃. ‘‘အပရိမေယျေ ဣတော ကပ္ပေ၊ ပဉ္စသီလာနိ ဂေါပယိံ၊
ဒုဂ္ဂတိံ နာဘိဇာနာမိ၊ ပဉ္စသီလာနိဒံ ဖလံ.
၁၅၄. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊
ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.
ဣတ္ထံ သုဒံ အာယသ္မာ ပဉ္စသီလသမာဒါနိယော ထေရော ဣမာ ဂါထာယော အဘာသိတ္ထာတိ.
ပဉ္စသီလသမာဒါနိယတ္ထေရဿာပဒါနံ စတုတ္ထံ.