၄. ဧကပုပ္ဖိယတ္ထေရအပဒါနံ

၁၆. ‘‘ဒက္ခိဏမှိ ဒုဝါရမှိ၊ ပိသာစော အာသဟံ တဒါ၊

အဒ္ဒသံ ဝိရဇံ ဗုဒ္ဓံ၊ ပီတရံသိံဝ ဘာဏုမံ.

၁၇. ‘‘ဝိပဿိဿ နရဂ္ဂဿ၊ သဗ္ဗလောကဟိတေသိနော၊

ဧကပုပ္ဖံ မယာ ဒိန္နံ၊ ဒွိပဒိန္ဒဿ တာဒိနော.

၁၈. ‘‘ဧကနဝုတိတော ကပ္ပေ၊ ယံ ပုပ္ဖမဒဒိံ တဒါ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၁၉. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဧကပုပ္ဖိယော ထေရော ဣမာ ဂါထာယော အဘာသိတ္ထာတိ.

ဧကပုပ္ဖိယတ္ထေရဿာပဒါနံ စတုတ္ထံ.