၃. ပစ္စုဂ္ဂမနိယတ္ထေရအပဒါနံ

၁၁. ‘‘သီဟံ ယထာ ဝနစရံ၊ နိသဘာဇာနိယံ ယထာ၊

ကကုဓံ ဝိလသန္တံဝ၊ အာဂစ္ဆန္တံ နရာသဘံ.

၁၂. ‘‘သိဒ္ဓတ္ထံ လောကပဇ္ဇောတံ၊ သဗ္ဗလောကတိကိစ္ဆကံ၊

အကာသိံ ပစ္စုဂ္ဂမနံ၊ ဝိပ္ပသန္နေန စေတသာ.

၁၃. ‘‘စတုန္နဝုတိတော ကပ္ပေ၊ ပစ္စုဂ္ဂစ္ဆိံ နရာသဘံ၊

ဒုဂ္ဂတိံ နာဘိဇာနာမိ၊ ပစ္စုဂ္ဂမနေ ဣဒံ ဖလံ.

၁၄. ‘‘သတ္တတိံသေ [သတ္တဝီသေ (သီ. သျာ.)] ဣတော ကပ္ပေ၊ ဧကော အာသိံ ဇနာဓိပေါ၊

သပရိဝါရောတိ နာမေန၊ စက္ကဝတ္တီ မဟဗ္ဗလော.

၁၅. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပစ္စုဂ္ဂမနိယော ထေရော ဣမာ ဂါထာယော အဘာသိတ္ထာတိ.

ပစ္စုဂ္ဂမနိယတ္ထေရဿာပဒါနံ တတိယံ.