၄. အဗ္ဘဉ္ဇနဒါယကတ္ထေရအပဒါနံ

၁၄. ‘‘ကောဏ္ဍညဿ ဘဂဝတော၊ ဝီတရာဂဿ တာဒိနော၊

အာကာသသမစိတ္တဿ [အကက္ကသစိတ္တဿာထ (အဋ္ဌ.)]၊ နိပ္ပပဉ္စဿ ဈာယိနော.

၁၅. ‘‘သဗ္ဗမောဟာတိဝတ္တဿ၊ သဗ္ဗလောကဟိတေသိနော၊

အဗ္ဘဉ္ဇနံ မယာ ဒိန္နံ၊ ဒွိပဒိန္ဒဿ တာဒိနော.

၁၆. ‘‘အပရိမေယျေ ဣတော ကပ္ပေ၊ အဗ္ဘဉ္ဇနမဒံ တဒါ [အမ္ဘဉ္ဇနမဒါသဟံ (သျာ.)]၊

ဒုဂ္ဂတိံ နာဘိဇာနာမိ၊ အဗ္ဘဉ္ဇနဿိဒံ ဖလံ.

၁၇. ‘‘ဣတော ပန္နရသေ ကပ္ပေ၊ စိရပ္ပေါ နာမ ခတ္တိယော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၁၈. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အဗ္ဘဉ္ဇနဒါယကော ထေရော ဣမာ ဂါထာယော အဘာသိတ္ထာတိ.

အဗ္ဘဉ္ဇနဒါယကတ္ထေရဿာပဒါနံ စတုတ္ထံ.