၉. ကုဋိဒါယကတ္ထေရအပဒါနံ

၃၃. ‘‘ဝိပိနစာရီ သမ္ဗုဒ္ဓေါ၊ ရုက္ခမူလေ ဝသီ တဒါ၊

ပဏ္ဏသာလံ ကရိတွာန၊ အဒါသိံ အပရာဇိတေ.

၃၄. ‘‘ဧကနဝုတိတော ကပ္ပေ၊ ယံ ပဏ္ဏကုဋိကံ အဒံ၊

ဒုဂ္ဂတိံ နာဘိဇာနာမိ၊ ကုဋိဒါနဿိဒံ ဖလံ.

၃၅. ‘‘အဋ္ဌဝီသေ [အဋ္ဌတိံသေ (သျာ.)] ဣတော ကပ္ပေ၊ သောဠသာသိံသု ရာဇာနော၊

သဗ္ဗတ္ထ အဘိဝဿီတိ၊ ဝုစ္စရေ စက္ကဝတ္တိနော.

၃၆. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ကုဋိဒါယကော ထေရော ဣမာ ဂါထာယော အဘာသိတ္ထာတိ.

ကုဋိဒါယကတ္ထေရဿာပဒါနံ နဝမံ.