၁၀. အဂ္ဂပုပ္ဖိယတ္ထေရအပဒါနံ

၃၇. ‘‘သုဝဏ္ဏဝဏ္ဏံ သမ္ဗုဒ္ဓံ၊ နိသိန္နံ ပဗ္ဗတန္တရေ၊

ဩဘာသယန္တံ ရံသေန [ရံသိယာ (သျာ.)]၊ သိခိနံ သိခိနံ ယထာ.

၃၈. ‘‘အဂ္ဂဇံ ပုပ္ဖမာဒါယ၊ ဥပါဂစ္ဆိံ နရုတ္တမံ၊

ပသန္နစိတ္တော သုမနော၊ ဗုဒ္ဓဿ အဘိရောပယိံ.

၃၉. ‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၄၀. ‘‘ပဉ္စဝီသတိကပ္ပမှိ၊ အဟောသိ အမိတောဂတော [အမိတဝှယော (သီ.)]၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၄၁. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အဂ္ဂပုပ္ဖိယော ထေရော ဣမာ ဂါထာယော အဘာသိတ္ထာတိ.

အဂ္ဂပုပ္ဖိယတ္ထေရဿာပဒါနံ ဒသမံ.

ထောမကဝဂ္ဂေါ ဆဗ္ဗီသတိမော.