၈. ပဏ္ဏဒါယကတ္ထေရအပဒါနံ

၂၈. ‘‘ပဗ္ဗတေ ဟိမဝန္တမှိ၊ ဝါကစီရဓရော အဟံ၊

အလောဏပဏ္ဏဘက္ခောမှိ၊ နိယမေသု စ သံဝုတော.

၂၉. ‘‘ပါတရာသေ အနုပ္ပတ္တေ၊ သိဒ္ဓတ္ထော ဥပဂစ္ဆိ မံ၊

တာဟံ ဗုဒ္ဓဿ ပါဒါသိံ၊ ပသန္နော သေဟိ ပါဏိဘိ.

၃၀. ‘‘စတုန္နဝုတိတော ကပ္ပေ၊ ယံ ပဏ္ဏမဒဒိံ တဒါ၊

ဒုဂ္ဂတိံ နာဘိဇာနာမိ၊ ပဏ္ဏဒါနဿိဒံ ဖလံ.

၃၁. ‘‘သတ္တဝီသတိကပ္ပမှိ၊ ရာဇာ အာသိံ သဒတ္ထိယော [ယဒတ္ထိယော (သီ. သျာ.)]၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၃၂. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပဏ္ဏဒါယကော ထေရော ဣမာ ဂါထာယော အဘာသိတ္ထာတိ.

ပဏ္ဏဒါယကတ္ထေရဿာပဒါနံ အဋ္ဌမံ.